सैतान 

रामहरि पौड्याल

भरतपुर १२/१९३, चितवन

सैतान आउँदै छ यहिं हुँदो,

बिना पूर्ब संकेत, बिना पूर्ब चेतावनी

महा प्रलय, महा संग्राम बनेर

अहो ! यसका सिङ्गहरु,

उधिनिरहेछ, मानवता सभ्यता र स्वतन्त्रताका बुर्जाहरु

ताण्डवनृत्य यसका,

मेरो आस्था बलत्कार भोगिरहेछ -

मेरै धर्तीमा !

प्रेम,स्वर्ग र स्वप्नको धुँवा र खरानी देखिरहेछु आँखामा

ठूला ठूला घरहरु , सुन्दर सुन्दर बागहरु,

झुम्दै गर्ने भ्रमरहरु, चुम्दै गर्ने फूलहरुको

सपना अस्तिमात्र देखेंथे,

म सुँघदै छु परदेश बाट देश यतिखेर

म रोज्दै छु भेष यतिखेर,

सैतान ! हिजो हिरोशिमा बनेर पड्केको थियो,

कहिले तड्पेको थियो सद्धामको छाती ताकेर,

सैतान ! आज ट्वीन टावर भएर पड्केछ नियुयोर्क भरि

पेन्टागन छेडेर भागेछ वासिंगटन डिसीभरि |

मैले भाबिस्यबाणी गरें – त्यो फेरि बल्जिनेछ बदलामा,

त्यो फेरि दन्किने छ प्रतिसोधमा ,

ओसामा बिन लादेनको छाती भरि,

अफगानस्थानको मरुभूमिभरि |

सम्प्रति:संयुक्त अधिराज्य बेलायत

रचना काल: १५ सेप्टेम्बर २००१, फिलिपिन्स